Eynşteynin yuxuları

Albert Eynşteynin 1905-ci ildə İsveçrədə Patent İdarəsində işləyərkən gördüyü yuxuların “bədii kollajı”ndan ibarət olan “Eynşteynin yuxuları” romanı müasir klassikanın bir nümunəsidir. Hər kəsdən fərqlənən, qəribə xasiyyətə malik, lakin bir o qədər də həssas olan gənc dahi nisbilik nəzəriyyəsini, zamanın yeni konsepsiyasını yaradarkən təsəvvüründə müxtəlif dünyalar canlandırır və bu dünyaların hər biri zaman nöqteyi-nəzərindən bir-birindən fərqlənir. Bu dünyaların birində zaman sanki dairə üzrə dövr edir və elə hey təkrarlanır, nəticədə insanlar eyni prosesi dönə-dönə təkrar edirlər. Digərində isə elə bir yer var ki, orada zaman dayanır, yaşadıqları anın heç bitməsini istəməyən sevgililər, övladlarını itirməkdən qorxan valideynlər balalarını bağırlarına basaraq bura gəlirlər. Başqa bir dünyada isə zaman bir bülbüldür və bəzən şüşə qalpağın altına düşür... İndiyədək 30-dan çox dilə tərcümə edilmiş “Eynşteynin yuxuları” romanı dünyanın bir sıra ssenaristləri, yazıçıları, rəqqasları, musiqiçiləri və rəssamları üçün ilham mənbəyi olmuşdur. Səhnələşdirilmiş və kətan üzərinə köçürülmüş versiyalarda əsər elm və incəsənət arasındakı telləri, yaradıcılığın incəliklərini və insan təbiətinin kövrəkliyini üzə çıxarır.