Каталог
RU (RU)
0Корзина

Görkəmli yazıçı Mir Cəlalın xatirəsinə həsr edilmiş tədbir keçirildi

Сентябрь 30, 2023

Sentyabrın 29-da TEAS Press Nəşriyyat Evinin və “Ədibin Evi” Ədəbiyyata Dəstək Fondunun birgə əməkdaşlığı ilə “LIBRAFF”da görkəmli yazıçı, alim və pedaqoq Mir Cəlalın xatirəsinə həsr edilmiş tədbir keçirildi. 

Tədbirdə Mir Cəlalın hələ 1941-ci ildə dahi Nizaminin 800 illik yubileyi münasibəti ilə “Xəmsə” dən uşaqlar üçün nəsrə çevirdiyi və TEAS PRESS Nəşriyyat Evi nəzdindəki “3 alma” uşaq ədəbiyyatı bölməsi tərəfindən nəşr olunan hekayələr toplusunun təqdimatı oldu.
Qeyd edək ki, “3 alma” həm də böyük ədibin Nizami yaradıcılığı əsasında qələmə aldığı məşhur hekayələrdən birini - “Fitnə”ni Azərbaycan və ingilis dillərində nəşr etmişdir.

Tədbirdə çıxış edən “Ədibin Evi”nin icraçı direktoru Şəfəq Mehrəliyeva bildirdi ki, Nizaminin müdrik və sirli-sehrli poeziya dünyasının uşaqlara əlçatan edilməsi üçün şairin dahiyanə yaradıcılıq nümunələrini uşaqların anlaya biləcəyi nəsr şəklində qələmə alması ideyası Mir Cəlalın təkcə Nizami yaradıcılığına böyük sevgisindən deyil, həm də gənc oxuculara məhəbəttindən irəli gəlirdi.
“Ədibin Evi”nin həmtəsisçisi, Bakı Dövlət Universitetinin professoru Təhsin Mütəllimov öz çıxışında qeyd etdi ki, böyük ədibin Nizami poemalarından seçib təqdim etdiyi bugünkü yeni nəşrlər anlaşıqlı, sadələşdirilmiş dilə yazılsalar da, onlardakı dərin məna yükü böyük ustalıqla saxlanılmışdır.
Xatirə tədbirində Mir Cəlalın ssenarisi əsasında 1943-cü ildə çəkilən “Bir ailə” filmi haqqında söz açan sənətşünas-tənqidçi alim İlham Rəhimli II Dünya müharibəsində qazanılan qələbədə Azərbaycan xalqının rolunu vurğulayan “Bir ailə” filmini yüksək qiymətləndirdi və filmin o dövrdə bir çox Azərbaycan həqiqətlərini vurğuladığı üçün Sovet senzurası tərəfindən ekranlara buraxılmadığını bildirdi.
Xatirə tədbirində Azərbaycan Dövlət Mədəniyyət və İncəsənət Universitetinin tələbələri Mir Cəlalın “Xoşbəxtlik barədə” hekayəsini səhnəcik şəklində təqdim etdilər. Rejissor və aktyor Kamal Yaşar Azərbaycan poeziyasından seçmə şeirləri ifa etmiş, həmçinin maraqlı musiqi nümunələrindən də istifadə olunmuşdur.





Недавнее